डॉक्टर म्हणतायत, मला कॅन्सर झालाय…
जगण्यासाठी माझ्याकडे, फार कमी वेळ उरलाय…
डॉक्टर म्हणतायत, मला कॅन्सर झालाय….
कट्ट्यावर मित्रांसोबत सिगरेट पिताना,
हे असं होऊ शकेल, असं वाटलं नव्हतं;
मरणाचं भय कधी, माझ्या मनात दाटलं नव्हतं;
आता मात्र माझ्या ह्रदयाचा, अगदी थरकाप झालाय…
डॉक्टर म्हणतायत, मला कॅन्सर झालाय….
हॉस्टेलच्या गच्चीवर नेहमीच, आमची मैफल जमायची;
आनंद-दुःख साजरं करण्यासाठी, अलगद मदिरा प्राशन व्हायची;
दारुच्या जागी आज हाती, मृत्युचा प्याला आलाय…
डॉक्टर म्हणतायत, मला कॅन्सर झालाय….
जगण्याच्या मजेसाठी, मरणाचं भांडवल मी घेतलं;
स्वातंत्र्याच्या नावाखाली, मृत्युलाच जोपासलं;
आज पहिल्यांदाच मी, अंत एवढ्या जवळून पाहीलाय…
डॉक्टर म्हणतायत, मला कॅन्सर झालाय….
जगण्यासाठी माझ्याकडे, फार कमी वेळ उरलाय…
डॉक्टर म्हणतायत, मला कॅन्सर झालाय….
Subscribe to:
Post Comments (Atom)
0 comments:
Post a Comment